Pianna Gam | Sang Valte

Sian in piaksa, pupa' satsa.
Tuun leh zua lenna, kilbang ka khanna.
Singta-te pan ngalliang-te humbitsa,
Tu in melma piandang in Zogam zeelsuak e,
Singdang hilou, singta siamsa hilou;
Tualsung siamsa, tual doh-ai neekgukna hi.

Vaimang henkol pan zong suakta-lou a,
Henkol dang but beh, henkol naubang pomlai,
Niang-leh-tai in nun in na nuam,
Saltang hihlam zong phawkman selou maw?
Na laizom-te sung gilkial a,
Na tunna Zogam tulpaan in zeem e!

Ka-tu ka-ta kankhiak na ding,
Khangsawnte luahding, siambang sinna ding,
Ka sannem toh ngabang ka lenna ding,
Saltanglou Zogam a Siangmang biaktheihna ding in,
Angmasial sal tanna pan suakta ni,
Zogam hong paal na ding, tua bek in palbang nang hilou hiam?

© 2008 Sang Valte